ఢిల్లీలో తెలంగాణ భవన్ నిర్మాణంపై మార్చిలోపు నిర్ణయం తీసుకుంటామని తెలంగాణ రోడ్లు, భవనాల శాఖ మంత్రి కోమటిరెడ్డి వెంకట్ రెడ్డి అన్నారు. మంగళవారం ఢిల్లీలోని తెలంగాణ భవన్ నిర్మాణ స్థలాన్ని పరిశీలించిన మంత్రి.. అనంతరం దానిపై రివ్యూ నిర్వహించారు. ఈ సందర్భంగా ఉమ్మడి ఏపీ భవన్ ఆస్తుల వివరాలను, తెలంగాణకు రావాల్సిన వాటాను మ్యాప్ ద్వారా అధికారులు వివరించారు. అనంతరం ఉమ్మడి ఏపీ భవన్‌లోని పలు బ్లాక్‌లను మంత్రి పరిశీలించారు.
ఈ సందర్భంగా కోమటిరెడ్డి మాట్లాడుతూ ఉమ్మడి ఏపీ భవన్‌కు చెందిన 19 ఎకరాలను పరిశీలించామన్నారు. ఢిల్లీలో తెలంగాణ భవన్ నిర్మాణం ఇప్పటికే ఆలస్యమైందని ఉమ్మడి ఏపీ భవన్ విషయంలో 2 రాష్ట్రాల మధ్య వివాదం లేదన్నారు. 58:42 రేషియోలో పంపకాలు ఉంటాయన్నారు. డిజైన్లు, ఖరారు చేసి టెండర్లు పిలిచి ఏప్రిల్ నాటికి తెలంగాణ భవన్ నిర్మాణ పనులు చేపట్టాలని భావిస్తున్నట్లు చెప్పారు. ఈ విషయాన్ని హైదరాబాద్ వెళ్లాక సీఎంతో చర్చిస్తానన్నారు.